第一集：馬運之都
主辦國際體育盛事，絕對不容有失，為此組織委派神秘嘅寧風，暗中調查各單位的進度。而神秘嘅寧風，當然不會單獨行事……
「哈囉寧風」
「哈囉褔蛙」
在一個偌大的客廳裡，一部擴音機跟五隻蛙展開對話，牠們一隻紅、一隻黑、一隻藍、一隻黃、一隻綠，是寧風秘密為組織培訓出來的特務。
「褔蛙，又有艱巨嘅任務！」寧風在擴音機說。
「Impossible is nothing！」褔蛙們乖巧地套用了指定贊助商的口號回應。
「你哋要去打探一下馬運之都嘅情況！」擴音機說。
「知道！」五隻福蛙於是跳到香港，分頭行事。
紅蛙負責檢查場地，發現果然是世界一流；黑蛙檢驗馬匹，全部健健康康；藍蛙調查保安系統，沒發現任何漏洞；黃蛙了解各項相關配套，一切亦相當完善。大家深信，要光榮完成任務，今次香港一定得。
「咦？綠蛙呢？」藍蛙額角冒了一滴冷汗。
「會唔會走咗去中銀排隊？哈哈哈！」黃蛙搞了個爛Gag。
「呢個時候仲講笑！」 一把既陌生又熟悉的聲音說。「你哋以為今次馬運之都嘅任務咁就完成？」
「舒拉寶蛙？」紅蛙認得牠，牠九七年前就被寧風派到香港，以網球手身分掩飾。
「香港人愛賭馬不等如愛馬術，馬術該怎樣欣賞，欣賞那裡，沒有幾個人知道。政府沒有把握前幾年的時間去深化市民對馬術的愛好，只花一個月催谷大眾對馬運的熱情，又如何可以自認為馬運之都？之後又點能夠持續發展？」可能舒拉寶蛙在香港留得太久，跟普羅大眾一樣，習慣把責任都算到政府頭上去。
「現在還嘮嘮叨叨？第一，我哋要支持香港協辦比賽，第二，我哋要盡快搵番綠蛙，你幫唔幫手先？」黑蛙說得斬釘截鐵。
究竟，綠蛙失蹤會否遇上危險，背後會否隱藏陰謀？下回分曉。
第二集：毒氣
上回講到，綠蛙失蹤，其餘四隻俏褔蛙欲尋不果，又撞正舒拉寶蛙講馬術，牛頭不搭馬咀。當大家不知何去何從之際，一個神秘身影把一盒錄影帶交到黑蛙手上，然後絕塵而去。
「咩嚟㗎？」藍蛙額角又冒出一滴冷汗。
「好明顯係一盒錄影帶。」 黃蛙又再搞爛Gag。
「呢個時候仲講笑？不如返你哋個大本營從長計議啦！」舒拉寶蛙說罷，就跟大伙兒回去，但黑蛙心裡，有一種不祥預感。
「哈囉褔蛙！」大廳內擴音機再次響起，神秘嘅寧風依然風騷，明顯不知道綠蛙身陷險境。
「寧風！綠蛙失蹤，我哋又收到盒神秘過你嘅錄影帶，唔同你講住啦！」紅蛙說罷，把影帶推入機內。
「歡迎收睇國家地理雜誌，今集我哋嘅主角係毒蛙！」電視機竟然播放著一個生態節目。「嗱，毒蛙有好多種，紅、黃、 黑、 藍，越鮮艷越毒，至於綠色嘅，多數只係普通品種，冇毒嘅，中毒就有佢份…」影帶突然斷開，錄影機爆炸冒出黑煙。
「全部咪郁！」舒拉寶蛙突然拿起網球拍，瞄著幾隻俏褔蛙。「綠蛙喺我手上，而且我將佢放入咗密封的膠箱囚禁，裡面注滿咗青島綠藻同超濃縮嘅北京空氣，你哋知道北京空氣質素未達標㗎啦，呢啲就係過往著重發展為先嘅惡果，就算地盤停工，限制汽車使用，只不過係家醜不出外傳嘅掩眼法。」
「你同我收聲，你根本不懂國情，難怪我當日將你放…逐…𠵱吖」雖然隔著一部擴音機，但眾人聽得出寧風該是心臟病發。
「寧風！」褔蛙們喊得悲壯，卻做不到甚麼。
「哈哈哈…你哋以後唔使聽部擴音機點啦，仲唔多謝我？聽住！你哋只要乖乖咁交出一樣嘢，我就放走隻綠色嘢，如果唔係，佢就會慢性中毒而死！」舒拉寶蛙說罷，眼神有如打出一個A屎波那樣狠！
究竟，要交出的是甚麼？五隻俏褔蛙可否化險為夷？請留意下集大結局。
大結局：美女風雲
上回講到，舒拉寶蛙用計潛入褔蛙總部，把神秘嘅寧風激至心臟病發，又以網球拍脅持褔蛙，要求牠們交出一件東西…
「我哋冇咩可以交畀妳？妳簡直喺度浪費時間！」黑蛙說話，一句到尾。
「 好！我就廢話少講！我要你哋交出莊曉岩！」舒拉寶蛙亦說得俐落。
「莊曉岩？何許人？」藍蛙一頭霧水。
「曉帆我就知邊個，曉岩？」黃蛙又搞個爛笑話。
「豈有此理，為中國奪得第一面女子柔道金牌嘅莊曉岩你哋都唔識？」舒拉寶蛙被氣得一臉通紅，搖搖頭再說：「算！那就交出林偉寧！」
「我知邊個，最近佢演小喬，的確好出色！」紅蛙搶答。
「嗰個係林志玲，林偉寧做亞視㗎！」黑蛙肯定的說。
「神經病！做亞視嗰個叫林偉辰，男人嚟㗎！林偉寧係悉尼奧運女子舉重冠軍！」舒拉寶蛙越說越激動， 再問：「算！那就交出欒菊傑！話定畀你知嘞，佢係首位獲女子花劍金牌嘅亞洲人，有東方第一劍之稱！再唔係，交出吳小旋，佢係中國第一個獲奧運金牌嘅女性！」
「邊個嚟㗎？我淨係識郭晶晶咋噃！」黃蛙說。
「係呀係呀係呀！」褔蛙們想起郭晶晶，就變得神暈顛倒。
「你哋呢班人，追捧運動名星只係睇樣，同樣一面金牌，同樣經過失去童年嘅刻苦訓練，練舉重，柔道，練到走晒樣，我哋唔應該更加支持佢哋咩？點解姿色欠奉嘅金牌精英，都要落得寂寂無聞嘅下場？」舒拉寶蛙乃美女一名，估不到竟有如此心腸。
「最近璇美人劉璇出唱片喎，你哋有冇買呀？」紅蛙依然停留在美女運動員的綺夢當中，沒有聽到舒拉寶蛙的說話。
突然，舒拉寶蛙的視像手錶亮起：「我哋要收手嘅呢！」話說起來，該是個日本人。
「畫他私蛙大人？」舒拉寶蛙神色慌張，只見其首領被一神秘男子制服。
原來，神秘嘅寧風假裝心臟病發，派突擊隊圍剿敵方巢穴，攻其無備，成功救出綠蛙，最後拿著十年前那部賣廣告的數碼通電話，向大家宣佈：「我哋有能力打撃任何恐怖活動！奧運會，正式開幕！」
