話說中央為慶祝香港回歸十周年，再送兩隻大熊貓畀香港。香港動物界為此舉行了一次動物大會，討論回禮的問題，並由安安與佳佳主持。
安安說：「祖國對我哋香港太好，CEPA同自由行都係送嘅，今次又送上610、606兩隻國寶，作為香港一分子，我哋點可以好似以前咁，多謝都冇句？」
佳佳加一句：「新年送盒蛋卷都要砸封利是啦！」
眾動物和議。
牆角條檐蛇率先提議：「回禮嘅話，回返兩隻避風塘炒蟹啦，最有香港特色！」
蟹不甘被炒，說：「後巷啲過街老鼠，夠有香港特色啦！」
過街老鼠說：「送我不如送米奇老鼠！起碼無人想毒死佢？」
米妮連忙為愛郎反擊：「要米奇單身寡仔北上發展？上面嘅女人好厲害㗎，唔得唔得！而且佢揸美國護照，唔屬於香港喎...」
米奇說：「新界啲牛，流浪咗幾代㗎啦，100%香港原居民。」
流浪牛說：「政府都趕我唔走，你想趕我走？」
泥鯭自動請纓，說：「維港又窄又污糟，我...想返大陸闖下...」
白紋伊蚊說：「回一條泥鯭做禮又太離譜，不如捉兩條中華白海豚湊夠一對啦，得體啲喎！」
「咦？唔見中華白海豚嘅？」嘉美雞問。
「邊度仲有白海豚吖，你估所有瀕危動物都好似熊貓咁幸福，有當地政府出錢出力保育嘅咩？」小灣鱺貝貝答道。
「係喎！點解海洋公園都唔出多啲力去保育啲白海豚，反而當我哋啲熊貓係寶嘅？」安安說。
「哼！你幾時見過香港人珍惜返香港自己啲嘢㗎！」佳佳說罷，各香港特區動物甚感無癮，連同乳豬全體散會去也！
