啦炳哥走入茶餐廳，鬼剎的喊道：「老細！奶醬多烘底！！奶茶少甜！！！」
這黑社會的粗聲粗氣，把老闆嚇得失魂，於是快快落了單便躲入廚房，心想，這些黑社會真是個文盲低能兒，多士當然烘底，熱奶茶沒放糖，根本沒有少甜不少甜。
「嗱！奶醬多烘底，奶茶少甜！」老闆心裡不服氣，但也不敢得罪，放下食物之前，重複一次柯打。
「呢啲咩嚟㗎？吓！」啦炳哥聲如雷震。
「咪奶醬多烘底，奶茶少甜囉！冇搞錯喎。咩呀…我…報警㗎！」老闆不甘示弱，但口震震的他明顯處於下風。
「我問你呢隻曱甴腳係咩嚟㗎！」啦炳哥用力指向茶杯，小強的斷肢還在緩緩轉動。
「唔好意思，呢杯唔收錢！」老闆嚇得手心冒汗，連忙鞠躬，收起茶杯就走！
「咪走住，呢啲又咩嚟㗎？」啦炳哥指向多士邊的點點黑色，該是發了霉。老闆被嚇壞了，啦炳哥再加一句：「食死人個喎，而家點先？」
老闆聽見食死人三個字，忽然火山爆發：「咩呀，咩食死人呀，咩呢啲咩嚟呀？我點知咩嚟呀，我哋而家會成立一個檢討委員會，跟進你嘅個案，你食好唔食好，食死咗都好，入得嚟叫咗嘢就要畀錢！」
做清潔的芯姐以前也是江湖中人，見場面火紅火綠，立即放低地拖把老闆拉開向啦炳哥賠罪：「你唔好怪佢，佢按咗間舖借錢醫佢生癌嘅老婆，幾年啦，錢又用晒，醫院又開啲毛霉菌別嘌醇食死佢老婆，醫院而家仲要佢埋單找清啲尾數，佢真係好慘㗎！」
「唓！發現隻曱甴腳，成餐唔使畀，個個香港人都係咁屈㗎啦，嗱呢餐我唔找數㗎啦，係咁！」啦炳哥借意逃離現場。
翌日，老闆拿著別嘌醇走到醫院的收費處鬼剎的喊道：「呢啲咩嚟㗎？吓！」
職員不慌不忙便說：「我哋而家已經成立一個檢討委員會了解今次嘅事件，對於受影响嘅市民，我哋表示惋惜。」
醫院職員果然看慣生死，說話已經不存在感情。
「你哋開啲藥食死人，我唔會畀錢㗎！」老闆說。
職員搖頭便說：「你估而家係喺茶餐廳發現曱甴腳然後鬧兩鬧發窮惡就拍拍羅友唔駛畀錢呀，茶餐廳就驚你揚出去於是買你怕啫，我哋啲嘢通晒天㗎啦，發惡無用㗎，咁多藥有問題，係製藥公司嘅問題，唔關醫院事，食錯毒藥都好，都要速速磅！」
（下集再續）
上集提到，茶餐廳老闆大鬧醫院取回公道，醫院職員亦有理直說，雙方水火不容，老闆捲起衣袖正想動粗之際…
「啦！炳！哥！！！」急症室傳出了死亡的呼喚。
原來昨日在茶餐廳搞事的啦炳哥被警方擊斃，被推至急症室後證實死亡，在場目撃的觀眾無不感到悲痛欲絕，有人大呼枉死，有人甚至當場拍下遺照，打算上載到facebook給公眾致祭。
茶餐廳老闆好奇，走到急症室看看，果然是那個黑社會，心想，上天總算懂得黑白是非，好人早死，壞人亦無好死，心裡湧出一股涼意，說： 「食嘢唔畀錢吖嗱！」然後轉身就走。
「你講咩呀？吓！」這把聲音響如雷震，老闆成個人跳了一跳，回頭一望。
「啦炳哥？！」老闆退了兩步。
時間像停頓了一樣，老闆以疑惑的眼神看著啦炳哥一雙怒目。
「點解…你未死…㗎！」 老闆嚇得手心冒汗，連忙鞠躬道歉！
「劇本同醫院一樣，都係亂嚟㗎啦！我點解翻生？問編劇啦！」啦炳哥說。
「因為佢其實係醫管局嘅臥底，要留番條命調查接二連三嘅醫療事故。」本故事作者黃曉帆說。
「係咩？點解我唔…咳咳…知㗎？」啦炳哥說。
雖然啦炳哥翻生，但為了令劇情較為合理化，作者特意加了兩聲咳，表示他仍然身負重傷！
「醫生醫生！快啲救佢呀！」一名每晚追看電視劇的觀眾淚流披面地呼喊著。
「快啲幫佢麻醉，我要同佢做手術！」醫生一聲令下，麻醉師立即動手。
「弊！點解稀釋麻醉藥啲鹽水嘅份量多咗500ml㗎？咁麻咗都唔醉個喎！」麻醉師手足無措。
「啦炳哥係江湖中人，少少痛頂得住嘅，繼續做手術啦！」醫生以堅定的眼神說。
「嘩！咳咳！好痛！」啦炳哥慘叫。
「護士，開啲咳藥水嚟！」醫生連忙就說。
「啲藥水過晒期喎，不如改用雙倍嘅化療藥吖！」護士這樣回答。
「咁輸血先啦！」醫生見機行事。
護士拿了血包插入大動脈，忽然大叫：「弊！調錯血液樣本標籤輸錯血添！」
就這樣，三小時的手術並不算得成功，醫生垂著頭走出急症室，向支持啦炳哥的群眾說：「對唔住，我…唔見咗把手術刀。」說罷，啦炳哥終於與世長辭。
三日後，啦炳哥的屍首被調錯包，棄置到推填區。
真係死都要搞錯。
