據說北極的石油和天然氣蘊藏量佔地球的四分之一，取得北極控制權，變成侵略地球的第一步。於是世界霸權國家包括俄羅斯及美國，先後在北極宣示擁有權，最近連加拿大也要在冰天雪海設立永久深水港，分一杯羹，這個時候，愚蠢的人類卻不知道，真正的侵略者已經有所行動。
「人類只是自相殘殺嘅低等生物，星星叫，立即召喚狂派成員全面接收北極能源！」麥加登發施號令！
「係！到時柯柏文呢部貨櫃車想入油都幾難，哈哈哈！」星星叫禁不住奸笑三聲。
「藍星人並唔係咁易對付㗎！」Keroro軍曹告誡麥加登。
「我哋嘅侵略計劃，從來未成功過。」Tamama和應。
「青蛙仔，咁你又有咩高見！」麥加登反問！
「次按風暴作戰計劃！！拖冧股市，令藍星人破產，所有人自然無晒心機，到時我哋就為所欲為啦！哈哈哈哈」軍曹專登比星星叫笑多一聲。
「地球人無晒心機，加上佢哋只係一盤散沙，到時要取得地球嘅控制權就易如反掌！」麥加登接納軍曹的提議，雙方同意合作。
此時，博派領袖柯柏文在香港，扮作開工不足的貨櫃車，剛取得狂派軍情的大黃蜂趕至，與柯柏文商討對策。
「唔駛擔心，狂派想令股市狂冧？無可能！博派成員一於齊齊入市，博反彈！股市係唔會冧住嘅！」柯柏文表現得非常冷靜。
「點解？」大黃蜂的汽車音響，響起這兩個字！
「我收到可靠情報，未到北京奧運，股市係唔會冧住嘅！」柯柏文肯定地說。
「邊個話你知？」大黃蜂半信半疑。
「香港嘅師奶。」柯柏文說。
