一班同事吃午飯，十數人，飲茶最有氣氛。侍應加水，你吹水，不知不覺吃到最後，才知眼闊肚窄，枱面點心往往每款剩下一件，於是以下事件，又再重演：
阿甲：「喂，唔好嘥啦，搵人食埋佢吖。」
阿乙：「搵邊個呀？肥仔吖，你食得嘅。」
肥仔：「飽啦...阿邊個食吖，後生仔食到嘅！」
阿邊個想推個波畀女同事，但見女同事正在畫咀，心知嘥氣，自己又飽，但食件點心仔又點會唔得，不過凍冰冰，要食之前都食咗啦，而家至食，即係話畀人知原來你未飽，之前話飽話飽其實只係扮客氣，人哋一講你就食，畀人感覺好為食，於是死都唔食。
阿邊個於是提議：「猜！猜輸嘅食！」
阿丙：「猜？咁幼稚？你想猜即係你想食啦！」
甲乙丙丁戊己庚辛壬癸共十幾位異口同聲：「你食啦！」
如是這大家你推我讓，擾擾攘攘。
侍應趕落場，於是就上前隨便問一句：「啲嘢唔要囉呵？」
眾人未及反應，枱面已清。各位鬆一口氣。
我們，就是這樣浪費食物的。
