城市騙案多，避一個避唔到第二個。壞油槍呃你一個幾毫，壞情人可以呃你一世，天文台呃你今晚轉涼，賀歲波呃你有國家隊球星來港，茶樓侍應呃你話會跟跟張單，揼骨一粒鐘呃你三個字，買一千尺樓呃你三百尺，買1G記憶卡至少呃你10MB，俄國牛肉飯呃你一碟異國風情，飛魚籽呃人話係蟹籽，蟹籽燒賣嘅蟹籽其實又只係幾粒紅蘿蔔茸，小販寫大大隻$19同細細隻.99呃你件貨賣廿蚊唔使，政府賺爆庫房仲呃市民而家未係減稅好時機，而我就呃咗你一分鐘睇呢篇咁嘅嘢，無所謂啦，大家畀人呃慣，不過，搶，就唔得！
紐約期油由最高$80.3回落至近期最低$51.2，中東幾日前更決定唔減產，香港油價點解唔減？油公司揸住支油槍，仲搶得狼過葉繼歡。
油價高企，電費交通費以至一切物價都高企。我不怪責富士蘋果原來只產自山東煙台而非日本富士，因為至少，它不會叫人吃苦。
(註：此稿刊後約三日，各油公司紛紛減價一兩毫，只係一兩毫，多謝晒！）
