師奶一：「我個仔係神童，珠心算，又快又準！」
師奶二：「我個仔係神童，兩歲我就畀佢聽莫扎特，而家四歲，佢就識彈莫扎特！」
師奶三：「我個女都係神童，我做瑜珈佢又跟我做，佢條脷掂到腳趾公呀！」
師奶四：「咁講法，我個哨牙仔一定係神童，人哋用筆，佢用對哨牙篤部NDS，十足十以前卡通片嗰個電子神童！」
師奶五：「我對仔女真係神童，三歲我就迫佢哋背晒唐詩三百首，兩個加埋有成六百首咁多。最犀利就係佢哋唔明啲唐詩講咩都一樣背到，仲朗誦到咬牙切齒，真係天才！」
師奶六：「我班仔女都係神童，一個學空手道、一個學跆拳道，一個學劍道，贏到一屋都係獎，真係一屋都係！而家我見到佢哋幾個打交，都不知幾安慰！」
師奶七：「我以為個大仔係神童，於是我就去返工仲叫佢煮飯畀個妹食，點知...火燭...阿妹仲...」
師奶八：「唔好傷心，呢啲話唔埋嘅。講件事過你知吖，我覺得我個女係神童，而家周街都係神童，點解我個女唔係？」
師奶九：「我個仔，唔係神童，不過我懷疑我係，我細細個阿爸就成日讚我叻，最衰以前唔興神童吖，如果唔係而家就唔使做師奶！」
師奶十：「我個仔，我個女，我自己都唔係神童，不過一家樂也融融！」
