怒漢：「我哋潮洲人講潮洲話，點解會變成試題？」
考試局：「潮語係潮流用語，唔係潮州話，例如屈機，就係潮語嘞。」
怒漢：「吓？」
考試局：「你又唔使O晒嘴嘅，華夏五千年歷史以來，文字同用語根本就喺度不斷演變，潮語只不過係白話文中次文化嘅另類演繹啫，而考試考潮語，亦只不過係同生活接軌。」
怒漢：「都唔知你講乜，大我呀！」
考試局：「又唔使咁嬲，潮語係後生仔嘢，即係講出嚟有種潮味嗰啲咁嘅嘢囉。」
怒漢：「唓！即係鹵味啦！潮洲出名鹵味，我個仔都成日講，又成日食㗎。」
考試局：「鹵味，咁粗鄙，我哋話晒都係教育界嘅一分子，唔可以講呢啲嘢嘅。Shit，damn，What the hell就得，今年我哋就成功喺A-Level Listening嘅考試中，引入呢啲咁有感染力嘅字眼嘞！」
怒漢：「屎囉！乜屈機呢個字好斯文嘅咩，唔怪得之我唔曉囉。」
考試局：「OK la。」
怒漢：「咁如果學生好似我咁，又粗鄙又唔識屈機，點考試呀？老師冇教個喎。」
考試局：「而家啲學生，胡適就唔識，點會唔識呢啲潮語呀。潮語係大趨勢，冇得閃㗎啦，你都講下啦！」
怒漢：「魯迅食鹵味，食到O晒嘴！咁夠潮啦啩！」
考試局：「喪掂啦baby！」
