有人說香港經濟即將步入寒冬，但不可思議的是，街上依然人頭湧湧，就連聖誕老人今年也選擇來港入貨。
「HoHoHo，呢隻幾錢？」聖誕老人指著一隻鮑魚。
「 一蚊咋！」海味散貨場東主這樣說。
聖誕老人也不是懵懂伯伯，這未免平得過份，於是他鑽到另一間小店，又問：
「HoHoHo，呢隻幾錢？」聖誕老人指著一隻鮑魚刷。
「 一蚊咋！」五金店東主這樣說。
「 鮑魚一蚊， 鮑魚刷又係一蚊 ？」聖誕老人把手伸進那頭白髮內，搔了幾下。
「 阿伯，而家海嘯價吖嘛！唔減價自救，想自殺咩！」一邊說著，五金店東主拿著那鮑魚刷舞來舞去，好不激動。
聖誕老人的家鄉只有雪崩，沒有海嘯，不明白甚麼是海嘯價，不過，大街小店都以一元招徠，倒是有趣，反正今年Budget被聖誕老婆Cut了個七折，用以彌補先前的投資失利，今次來到購物天堂，賤物鬥窮人，一元大購物實在不枉此行。
跟正常人一樣，減價誘使人過度消費，幾個月來省下的，都要一次過反芻出來，聖誕老人血拼過後，面對著那派不完的禮物，頭開始痛起來。
「我想返芬蘭，不如我請你做看更幫我睇實啲貨吖？」聖誕老人遇上一個從澳門回流的失業工人，提出了這個建議。「時薪一蚊喎，海嘯價，HoHoHo！」
酬勞如此侮辱，還笑得如此無恥，失業工人打了聖誕老人一身！
方法行不通，然後聖誕老人遇上一名廣告人。「不如請你做個廣告，幫我散晒啲貨吖？嗱，經濟不景，你唔計個海嘯價嚟，我搵第二個㗎！」
此名廣告人最憎Cheap精，說：「咩海嘯價呀？食腦唔使開飯呀？你係聖誕老人，定係姓屈老人呀？」終於二人大打出手，被送往警署。
「而家三千蚊保釋，有冇問題？」警察說。
「三千蚊？有冇海嘯價？」聖誕老人死性不改。
「海嘯最緊要係合力災後重建，唔係老屈海嘯價攞著數，我而家要改控你趁火打刧！洗定八月十五啦！ 」 警察說。
