1. 小妹：「點解新年咁鍾意食字呢？桔等如吉、倒轉個福字等如褔到、髮菜蠔豉即係發財好市、連吹氣石油氣罐都可以硬屈做一團和氣。」
大哥：「好意頭嘛。」
2. 小妹：「咁趴街朱古力有咩意頭呢？」
大哥：「大吉利是，再講過！」
3. 小妹：「係喎，利是利是，咁利是同攋屎又算唔算食字呢？」
大哥：「弊傢伙，你係咪傻咗，新年流流，再講過！」
4. 小妹：「咦，金幣弊弊聲，點解又放得入全盒呀？」
大哥：「阿媽，小妹亂講嘢呀！」
5. 小妹：「咪住，樂家？落價喎，唔怪得呢排股市咁差啦。」
大哥：「……」
6. 小妹：「仲有曲奇餅，谷奇病，點可以送贈親友呀試問？」
大哥：「咁夾硬都得？」
7. 小妹：「爺爺生前對我咁好，我唔忍心食椰絲㗎！」
大哥：「百無禁忌，百無禁忌，細路女唔識世界。」
8. 小妹：「瓜子？唔……媽咪得你一粒仔，保重呀。」
大哥：「？！」
9. 小妹：「究竟食字係爛gag定創意呢？新年個個都咁鍾意食字，咪個個香港人都好有創意囉，咁點解香港嘅創意工業又一直無乜起色呢？」
「我唔知你講乜，我淨係想了結咗妳！！！」
