日本漆：「你畀香港人投咗去，對我哋日本貨嚟講，係侮辱。」
日本一：「無肉？我就係太多肉，至畀為食嘅人類捕捉。而且事先聲名，我唔係日本貨，我來自大西洋......本來......就應該自由自在住喺大西洋。」
日本漆：「聽你嘅語氣，好hurt咁喎。」
日本一：「我心裡面嘅創傷同裂痕，你唔會明。」
日本漆：「我明，我嘅專長係修補裂痕，菊花牌就無呢個功能嘞。」
日本一：「咁你明唔明點解人類要將我哋趕盡殺絕吖？」
日本漆：「這個嘛......根據數字顯示，04年大西洋藍鰭吞拿魚的數量，只相等 1975年時期嘅19%。」
日本一：「舊年我就有200萬噸朋友，畀人類食咗，其中四分一係日本人！」
日本漆：「咁你一定好驚日本人。」
日本一：「唔係，我驚中國人。以我哋而家嘅魚口，點夠餵飽呢十幾億人口？有朝一日，壽司飯上面再唔會見到吞拿魚！」
日本漆：「仲有香港人呢？幾貴都好，一日就可以將你分屍到乾乾淨淨。」
日本一：「我哋呢啲弱勢社群，專畀有錢人剝削。」
日本漆：「不過我覺得呢個係樣嘅問題，同樣有絕種危機，同樣有個肥腩，可愛嘅熊貓同樹熊就唔會畀人食吖。」
日本一：「你似乎係一罐有見地嘅油漆。」
日本漆：「都係跟啲裝修師傅學嘢啫。」
日本一：「做裝修都對吞拿魚咁有研究，真係要拜會下幾位師傅。」
日本漆：「三點三，閃咗。」
日本一：「下午茶？真係識歎！」
日本漆：「No la，係晚飯，三點三去板前門口等位差唔多㗎啦。」
日本一：「全民吞拿魚，今次大災難！」
