記者：「今日我哋好高興請到丁蟹先生接受我哋嘅訪問，丁生呀，想問下...」
丁蟹：「唔駛問啦！無丁蟹效應嘅，今次唔關我事！」
記者：「唔係，想問下你對於後市嘅睇法啫。」
丁蟹：「唔知！你問幾位阿叔囉，佢哋話農曆年前會去到幾點話？亂講嘢害死人㗎！好多人真係以為有股神㗎！股災嗰幾日，啲股神去晒邊先？」
記者：「咁你對小投資者有咩忠告？」
丁蟹：「七個字：人善人欺天不欺！」
記者：「你嘅意思係，牛市未完，而家係入市嘅時候？」
丁蟹：「都唔知你講乜！總之我四個仔都咁孝義，一定幫老豆賺番返嚟嘅！」
記者：「咁即係幾時入市呢？」
丁蟹：「係貪婪同恐懼之間，應該仲有好多選擇！」
記者：「係任志剛嘅說話？」
丁蟹：「貪心輸錢贏，輸血不輸錢，人人去輸血，殺人不打風...」
記者：「係大時代嘅股票必勝法？」
丁蟹：「聲色報價，盡在股霸！」
記者：「係陸叔嘅誠意推薦？丁生，你嘅說話同市場一樣，好波動喎！」
丁蟹：「波動？你哋啲財經人，升市就好地地，跌市就話近排好波動，搞到啲人心思思短炒博反彈，喂，三萬二跌到二萬二直頭係大跌市啦！講嘢直接啲，好易害死人㗎！」
記者：「你意思係，咁波動，而家係時候買跌？」
丁蟹：「點解你哋咁鍾意煸動人去估幾時入市㗎？點解而家香港咁多財經節目㗎？點解連都市閒情都冇晒閒情，李錦聯煮飯之前都要講股票㗎？」
記者：「咁...最後一條問題，你估計...」
丁蟹：「又估？唔估啦！贈多你三個字啦！」
記者：「趁地腍？」
丁蟹：「係賴地硬！送畀嗰啲牙斬斬嘅股票預言家旁身！」
